نوێنەری حکومەتی هەرێمی کوردستان پێشوازی لە شاندێکی نوێنەرایەتی ئەنجومەنی سوریای دیموکرات دەکات

شانشینی یەکگرتوو، نووسینگەی نوێنەرایەتی، www.uk.gov.krd. کاروان جمال تاهیر نوێنەری حکومەتی هەرێمی کوردستان پێشوازیکرد لە شاندێکی ئەنجومەنی سوریای دیموکرات کە پێکهاتبوو لە دکتۆر محمد مصطفی و حسین مامۆ.

لە دیدارێکدا گفتوگۆ دەربارەی دوایین پێشهات و پەرەسەندنەکان و دۆخی سیاسی و ئەمنی لە رۆژئاوای کوردستان و سوریا و ناوچەی رۆژهەڵاتی ناوەراست کرا. شاندی میوان پوختەیەکیان لەسەر دۆخی هەنووکەیی رۆژئاوای کوردستان پێشکەشکرد و جەختیان لەسەر ئەوە کردەوە کەوا وڵاتی سوریا بە دۆخێکی هەستیاردا تێدەپەڕێت بە تایبەتیش دوا بە دوای رووداوەکانی ناوچەی سوەیدا و کاریگەرییەکانی لەسەر دروزەکان و پێکهاتەکانی تری ئەو وڵاتە. شاندی ئەنجومەنەکە هاوکات ستایشی رۆڵی کاریگەری سەرکردایەتی سیاسی هه‌رێمی کوردستانیان کرد لە پاڵپشتی و هەماهەنگیکردن لەگەڵ رۆژئاوا بەمەبەستی ئەوەی لە سوریای تازەی دیموکراتدا بە مافە ڕەواکانی خۆیان بگەن.

هەر لە کۆبوونەوەکەدا شاندی ناوبراو ئاماژەیان بەوەدا کەوا تەنها رێگا بۆ دروستکردنی سوریایەکی سەقامگیر و گەشەسەندوو، پابەندبوونە بە بنەماکانی دیموکراسی و ئازادی و پاراستنی مافی هەموو نەتەوە و ئایین و پێکهاته‌ جیاوازەکانی ئەو ووڵاتە، وە لەسەر ئەو بنەمایەشەوە، رۆژئاوا مامەڵە لەگەڵ حکومەتی سوریا و هاوپەیمانان و لایەنە پەیوەندیدارەکان دەکات.

نوێنەری حکومەتی هەرێمی کوردستان جەختی لەسەر گرینگی یەکڕیزی و تەبایی و هەماهەنگی بەردەوام کرده‌وه‌، هاوکات بایه‌خی سه‌رکه‌وتنی ڕۆژئاڤای له‌ سوریای نوێدا  وه‌ دروستکردنی تێگه‌یشتنی هاوبه‌ش له‌سه‌ر پێکه‌وه‌ ژیان و پێزانینی قوربانییه‌کانی ڕۆژئاڤای به‌ گرینگییه‌وه‌ باس کرد که‌ له‌ خزمه‌ت سه‌قامگیری و ئارامی سوریاو ناوچه‌که‌دا ده‌بێت.

هه‌ر له‌درێژه‌ی دیداره‌که‌دا نوێنه‌ری حکومه‌تی هه‌رێم، ئاماژەشی بە دۆخی گرژی تەواوی ناوچەکەدا کە پێویست دەکات هەموو لایەك هەنگاوەکان بە هۆشیاری و هەماهەنگی لەگەڵ یەکتردا بنێن بۆ ئەوەی ئازادی و سەقامگیری لە ناوچەکە گەشە پێبدەین و ئه‌زموون و خه‌باتی رۆئاوای کوردستان بپارێزرێت له‌ سوریایه‌کی فره‌یی و دیموکراتدا.

هەر لە کۆبوونەوەکەدا ژمارەیەك بیر و را و بۆچون پێشکەشکران و هەردوولا جەختیان لەسەر هەماهەنگی بەردەوامی نێوانیان کردەوە.

نووسینگەی نوێنەرایەتی، لەندەن
٣١ی تەموزی ٢٠٢٥