شاندێکی نوێنەرایەتی بەشداری لە یادەوەری پەنجاویەکەمین ساڵیادی بۆمبارانکردنی شاری قەڵادزێ دەکات

لەندەن، شانشینی یەکگرتوو، www.uk.gov.krd. شاندێکی نوێنەرایەتی حکومەتی هەرێمی کوردستان لە بەریتانیا به‌نوێنه‌رایه‌تی نوێنه‌ری حکومه‌تی هه‌رێم، کە پێکهتابوو لە خەسرۆ ئاژگەیی بەرێوەبەری کاروباری سیاسی و میدیا و هاورێ واحید بەڕێوەبەری بەشی بازرگانی و وەبەرهێنان بەشداریان لە په‌نجاویه‌که‌مین ساڵیادی بۆمبارانکردنی شاری قەڵادزە کرد.

بۆنەکە له‌ هۆڵه‌ند پارک بەرێوەچوو وه‌ لەلایەن ناوەندی قەڵادزە ڕێکخرابوو بە ئامادەبوونی ژمارەیەكی به‌رچاوی ڕه‌وه‌ندی کوردستانیان و میوانی بیانی، وە لەلایەن کەس و کاری قوربانیان و ژمارەیەك لە ئامادەبوان ووتار پێشکه‌ش کرا و تێیدا دڕنده‌یی ڕژێمی دیکتاتۆری و کاریگه‌ری تاوانه‌که‌ کە لە ئەنجامی بۆمبارانکردنی فرۆکەکانی رژێمی پێشوو عێراق بۆ شاری قەڵادزێ و به‌تایبه‌تی به‌ئامانج کردنی زانکۆی سلێمانی که‌ زیاتر له‌ ٣٥٠ هاوڵاتی بێتاوانی سیڤل و خوێندکاران بونه‌ قوربانی و  گیانیان سپارد.

ئاماده‌بوان جەختیان لەسەر گرینگی یادکردنەوەی ئەو تاوانانە کردەوە بۆ ئەوەی لە یاد نەکرێن، وە هاوکات پشتگیری زیاتر بۆ دۆزی کوردستان و رێگریکردن لە دووبارە بوونەوەی تاوانی هاوشێوه‌ دژ بە گەلی کوردستان. 
ئامادەبوان لە کۆتاییدا ٥١ دانە مۆمیان لە شوێنی بەرێوەچوونی بۆنەکە هەڵگیرساند و چەپکە گوڵیان خستە سەر درەختی هەڵەبجە و ئەنفال.

لەندەن
٢٤ی نیسانی ٢٠٢٥